高檔消費

    三年沒出專輯的周杰倫，月中發佈新單曲《說好不哭》上線兩小時，內地三大網上音樂平台即突破一千萬人仔銷量，MV又帶紅了一米七一的日本女星三吉彩花，還有哈蘇503CW相機。

    MV被嘲抄襲、炒冷飯，但橋唔怕舊，最緊要受。攝影男是個百年不衰的題材，攝影也是男生追女生的最大殺傷力武器，不論人人有手機的今天，還是黑白菲林年代均如是。影得一手好相，分外受歡迎，男女通殺。

    報道說，已停產的中幅相機哈蘇503CW，本來萬五人仔左右，MV一出，身價炒至兩萬多甚至三萬。是以有人貼文，“攝影窮三代，單反毁一生……奶茶發大財XDD”雖不中，亦不遠矣！現在相機越來越貴，以前用三千幾澳門元買純機械的名機Nikon FM2，一玩二、三十年冇問題。頂班70-200二點八標準變焦鏡王，亦只六千左右，可用一世。現在入門級的單反雖只四、五千，但三年左右，感光元件老化，整部要換。鏡頭不用說，好一點都萬萬聲，用幾耐又唔知。以上為日系，德系的leica、Carl Zeiss不消說。

    無錯，玩攝影有很多種，影大場面、運動當然不用低檔貨，輸人唔輸陣。自問窮的強生玩街拍，一部街拍之王GR殺晒，可恨最新的GR3都七、八千。定焦機仔而言，唔係搶，係乜？

    強  生

(原載於：2019 年9月28日《澳門日報》，c5版。